政情：社民連美加行 險食閉門羹
社民連向以激進作風見稱，不時辣火頭，估唔到呢啲火頭仲燒到去海外。話說社民連早前去美加訪問，當地部分民運人士嘅反應卻冷冰冰，原因或者與佢哋有成員對支聯會元老司徒華病情嘅說話引起反感等有關，連陶君行都話有人唔多想應酬佢哋。
海外民運人士同支聯會關係甚深，社民連早前就政改立場同六四遊行嘅訴求等，同司徒華及支聯會一再起衝突，消息傳到美加，似乎嗰邊嘅民運人士都唔多高興。陶君行尋日向傳媒介紹佢哋嘅美加訪問行程時，自爆部分民運人士唔想招待佢哋：「佢哋有啲就想見我哋，有啲就唔想，搞到分成兩派，我都好抱歉。」
佢哋此行同民運領袖王軍濤及吳仁華見過面，據講，王、吳二人整體上都同意該黨嘅抗爭路線，但勸佢哋要對華叔禮貌啲。雖然喺美加差啲畀人拒見，但都籌到十萬蚊，兼收到四百個新會員，對佢哋遲啲成立美加支部都應該有幫助。