今年係公共交通加價年，間間公司都當正市民係人肉提款機，排住隊申請加價。當中最影響低下層市民嘅，要數巴士公司；每日即使加一蚊幾毫，小市民已好難捱。運輸及房屋局副局長邱誠武尋日上電台，主持人問佢巴士申請加價，政府點應對，佢好似背書咁，話會考慮番公司盤數、目前經濟情況等，總之按現有機制處理。跟住主持人問佢藥後駕駛同菜園村、紫田村嘅拆村安排，佢一樣將以前嘅官方答案照背，簡直係林瑞麟咁人肉錄音機上身，講咗等於無講。
