政情：徐立之寄語新生自學發掘長處
作為本地百年老牌學府嘅香港大學，新生入學禮都跟足傳統，隆重過人。港大校長徐立之就喺典禮上叫定班大學一年級新生，唔好以為入大學只係靠老師教導，最緊要係自學，仲要組織活動，把握交流機會，咁先係一個大學生喎。
臨近開學，尋日係港大新生入學禮，除咗陸佑堂內聚滿數百個師生外，仲有學生要喺旁邊課室睇電視直播。按照傳統，每名學生都身穿綠色長袍，校長徐立之亦身穿銀白色領帶嘅長禮服。
徐立之致辭時勉勵新生話，雖然佢哋可以喺港大嘅學額競爭中佔一席位，但大學教學模式不同，更多時候唔係靠老師教學，而係要自學、做研究，從而發掘自己嘅長處。
徐立之大大話話都做咗八年港大校長，今年亦成功吸引多位內地尖子入讀，其中福建省高考狀元蔣藝同雲南省狀元李欣，仲捨棄內地名牌學府北京大學及清華大學嘅直接保送機會，寧願入港大分別修讀國際商業及環球管理學系和醫學院，皆因憧憬香港中西文化交匯環境，希望從中可以擴闊視野喎。