政情：赴菲名人自保各施各法
經過康泰旅行團喺菲律賓被挾持屠殺慘劇，菲國治安之差暴露世人眼前，香港親中陣營支柱之一嘅福建幫，十個有九個半同菲律賓都有淵源，經常往返菲國，佢哋對港人喺菲律賓警方「特蠢部隊」嘅「業餘」拯救下白白犧牲，無不悲憤填膺，仲透露未發生慘案前，佢哋每次去菲律賓都會做足保安工夫，各師各法，以後更會加倍小心。菲律賓治安惡劣到乜嘢程度，真係可見一斑！
蔡菜子親友曾被綁架
父母係菲律賓華僑嘅港區全國人大代表蔡素玉，星期一晚喺西藏收到母親由香港打嚟嘅電話，知道康泰旅行團喺菲律賓嘅慘痛經歷，心中極之悲憤，批評菲政府處理不力。蔡菜子話，菲律賓綁架當食生菜，佢嘅親友之中，有家人或朋友曾被綁架嘅，就有十幾人之多。
蔡菜子話，去到菲律賓，有三招自保。第一，一定唔搭的士，事關佢八、九十年代曾經喺菲國開展覽中介公司，公司兩名職員都試過搭的士時被洗劫，中招率係百分百，所以佢每次去菲律賓，都會叫世叔伯搵車接佢。第二，唔會單獨出街。第三，喺公眾地方，頸鏈、手鏈同戒指等貴重首飾，一律收起，財不露眼。
福建幫兩位「大佬」盧文端同洪祖杭，去菲律賓更加嚴陣以待，直情出動到武裝。已故父親係菲律賓華僑嘅盧文端，年年帶齊一家大小去菲律賓掃墓，今年據聞有軍方朋友，派咗架防彈嘅「平治」房車保護佢。盧文端話，菲國治安近年算係好番少少，以前仲差，佢喺菲國嘅親戚，大屋試過兩次畀匪徒爆竊，之後要廿四小時搵警衞把守。亦有一個生意上嘅朋友被人綁架，家人交出贖金後，先至執番條命仔。
盧文端大前晚喺電視見到菲警救人相當唔專業，結果流血終結，感到好悲痛。佢話以後去菲律賓會更加小心，出入盡量低調，用車都揀架殘舊啲嘅嚟坐咁話。
洪祖杭依家喺菲律賓嘅生意唔多，幾年先至去一次，不過，每次去保安工夫都唔敢怠慢。佢喺菲律賓有自己一套防賊措施，好似唔去陌生地方，亦一定入住大酒店雲集嘅地區，事關治安好啲，不過，最穩陣嘅，都係請當地朋友幫手，請保鏢護身。有幾穩陣呀？有真槍壓陣嗰隻。點解要咁大陣仗？睇今次康泰團慘劇，就知洪祖杭並非杞人憂天。一句講晒，菲律賓嘅治安有幾差，大家一眼睇晒！