中環耳目：翠華老闆推介「正斗」雲吞麵
到茶餐廳歎杯奶茶，食碗魚蛋粉，係唔少遊客訪港嘅指定行程，好多人對集團化經營嘅翠華餐廳更是慕名而來。卓妮早前喺個場合見到翠華餐廳集團主席李遠康，隨即拉佢埋一邊，問佢至愛邊間食肆，難得佢冇硬銷自己翠華嘅出品，反而話好鍾意食正斗粥麵專家嘅雲吞麵，盛讚佢哋嘅麵底夠傳統、用料好。
「佢哋唔錯！」
咦？翠華都有賣雲吞麵，康哥竟然幫襯人哋？卓妮忍唔住追問：「咁究竟邊間正斗啲？」康哥好淡定咁答：「佢哋唔錯！」答得幾妙喎，又冇貶低自己。
康哥盛讚正斗不止食物質素保持得好好，又有自己一套經營準則，唔會同人哋鬥平，所以佢好欣賞。講到自己嘅口味，佢話自己平時咩菜都啱食，尤其是日本菜，貪佢健康啲，總之口味好廣泛。近排佢都喺自家餐廳提倡健康飲食，盡量唔用添加劑、用少啲色素。
依家翠華喺全港已有廿間分店，上海有兩間，今年稍後就會喺澳門開分店。康哥咁努力將香港茶餐廳文化發揚光大，難怪被飲食界老行尊伍得良視為香港廿二位餐飲界奇才之一。