中環出更：蔡冠深戴錶最緊要實際
中華總商會會長蔡冠深經常周圍飛，時刻要掛住香港公司業務及中總會務，所以最緊要係掌握香港時間。卓妮早前就見佢戴住一隻長方形嘅天梭錶（Tissot）Classics Prince系列雙時區腕錶，隻錶能夠清楚顯示兩個地區嘅時間。呢款錶源於一九一六年嘅經典設計概念，鮮藍色時針及分針清楚易見，錶面採用強化礦石玻璃，穩重又夠實際。
雙時區方便出差
卓妮同蔡會長傾開佢手上隻天梭錶，佢就半推半就笑話：「價錢唔貴，中總會長最緊要實際嘛！至於牌子就唔好講啦。」但卓妮問佢係咪自己買嘅，佢就大大聲咁話：「唔係，係老婆送嘅！」仲笑謂老婆送嘅唔怕講，一臉幸福滿瀉嘅模樣，蔡太關穎琴聽到實甜到笑！其實呢款復古錶售價的確唔貴，幾千元就有交易，但實用性就好大。
所以話，蔡會長確係實際之人，佢隻錶戴咗兩、三年，而且錶不離身，皆因佢貪隻錶有兩地時間，方便出差時唔使調校當地時間，又唔使成日數手指計算香港時間。