中環出更：康錦煒獲邀任公民領隊
政商界名人二代陸續接棒，原來球壇名人二代一樣會接棒，最近就有幾位名人二代加盟球隊管理層。卓妮有日傍晚六點鐘喺置地廣場Cafe Landmark，見到足總名譽副會長康寶駒同足總副主席貝鈞奇喺度歎茶，傾咗一陣，有個好熟口面嘅戴眼鏡後生仔嚟到坐低，原來係康Sir做律師嘅囝囝康錦煒，究竟商量乜嘢大計呢？
管理層多名人二代
卓妮事後問番康Sir有乜搞作，原來身兼公民足球隊主席嘅貝鈞奇想邀請佢囝囝加盟公民足球隊擔任領隊，於是約埋一齊出嚟傾吓合作大計。康Sir話，錦煒細細個就好鍾意踢波，即使喺外國畢業回港執業做律師，都有到唔同球隊踢吓波，早前佢就踢過「東方」，現在加入埋「公民」。
「公民」現為甲組球隊，積分榜排頭幾名，絕對入得過，好多球壇名人二代已紛紛加入球隊管理層，好似足總主席梁孔德與立法會議員梁劉柔芬兒子梁耀宇就擔任總監、足總董事余錦基兒子余仲行就出任足球部主任，貝鈞奇兒子貝可泓就做行政總監，陣容咁鼎盛，相信可為球壇帶來一股新動力。
講番康Sir近況，佢無做足總主席之後一樣咁忙，早前去完南非個幾月為世界盃做評審後，嚟緊十一月又要到廣州十幾日，為亞運會做評審，明年一月再到多哈為亞洲盃做評審，真係無時停，所以暫時無計劃去外遊。
問康Sir點睇港隊參加十一月廣州亞運會足球賽，佢話今屆亞運會有幾十隊足球隊參加，而且好多都係強隊，所以今次港隊未必好似東亞運咁攞冠軍咁威風喎！不過，佢話十一月天氣開始進入秋涼，對港隊有利，但都要睇臨場表現能否發揮到水準。