正所謂得道多助，失道寡助，日前挺身而出阻止食環署人員圍捕年邁女小販嘅徐伯，被控阻礙公職人員執法及普通襲擊兩罪，尋日喺觀塘法院獲撤銷控罪，准佢自簽兩千蚊守行為九個月了事。事實證明，邪不能勝正，公道自在人心，徐伯見義勇為，固然令人拍爛手掌，而食環署野蠻執法，成為千夫所指，可謂咎由自取。
件事係咁嘅。有位患白內障嘅七十四歲張婆婆，喺街頭擺賣小貨物幫補家計，事發當日畀十幾個食環署人員圍捕，雖然張婆婆跪地苦苦哀求「畀次機會」，但食環署人員依然無動於衷，堅持要拘捕同充公貨物。七十歲嘅徐伯睇唔過眼，用身體掩護婆婆離開，結果與食環署人員發生碰撞，遭警方拘捕。
俗語話，路見不平，拔刀相助。徐伯與小販婆婆素未謀面，非親非故，只係因為不值食環署人員欺凌弱小嘅所作所為，所以挺身而出，仗義執言，呢種俠義行為唔單止冇罪，簡直應該大讚特讚添吖。當今社會世風日下，邪氣上升，如果多幾個好似徐伯咁有同情心及正義感嘅人，香港都會和諧啲、可愛啲。
話時話，件事搞成咁，食環署應該好好檢討吓。張婆婆年紀又大，又有殘障，佢唔想靠政府，只係想自食其力啫，咁又有乜嘢錯呀？何況婆婆賣嘅既唔係熟食，又冇阻街，食環署使唔使拉完一次又一次呀？正如徐伯話齋，婆婆真係好淒涼，要用拐杖，隻腳仲包住紗布，只要稍有惻隱之心嘅人都會心軟啦。食環署人員兇神惡煞，蠻不講理，簡直「無人性，畜牲不如」。
講番轉頭，法律不外乎人情，食環署執法冇人會反對，但都要合情合理至得㗎。查實，政府內部早就有指引，講到明對冇販賣熟食、冇阻礙繁忙通道，或者老弱傷殘嘅小販，只會口頭警告同驅趕，唔會拉人封艇。點解食環署人員當呢啲指引冇到呢？點解要對一位自力更生嘅婆婆趕盡殺絕呢？
其實，食環署人員一向欺善怕惡，類似例子唔係第一次發生㗎喇，比起佢哋將小販趕出馬路畀車撞傷、以及將小販趕落河浸死，呢次都係小兒科嚟咋。正如徐伯話齋：「無人性，專蝦老人家！如果畫龍雕鳳（紋身）嗰啲佢夠唔夠膽拉吖？」唔怪得有人將食環署販管隊比喻為內地嘅惡城管，睇佢哋嘅做嘢手法，又確有幾分相似。
呢，早前有位賣雪糕嘅流動小販，雖然持有合法牌照，但仍被食環署檢控，好彩遇到一位好心腸嘅法官，體諒呢位小販搵食艱難，只輕判罰一百蚊了事。法官仲質疑食環署：「就係因為咁嘅事就輕易告佢，有冇考慮清楚？」
係咯，食環署執法歸執法，但都要考慮清楚，要合情合理㗎，小販只係想自食其力搵兩餐啫，係咪一定要將佢哋趕盡殺絕，統統走去申請綜援，班官員先至心涼吖！