基本法委員會委員譚惠珠喺政壇向來惹火，好似早前公社兩黨推所謂嘅「五區公投」推得㷫合合嗰陣，珠姐上《城市論壇》發表意見就足以令全場升溫。尋日基本法推介聯席會議搞咗場全港大專生辯論賽，請咗熟悉《基本法》嘅珠姐擔任評判。由於大會係辯論極具爭議嘅功能組別存廢問題，好多人都期待珠姐發表吓高見，點知佢尋日竟然甩底，莫非條辯題太敏感，珠姐刻意避席？
非也！我哋收到風，原來珠姐早前做咗白內障手術，可能因為仲有啲唔舒服嘅關係，所以前晚十點臨時急call主辦單位話嚟唔到。與珠姐同為港區全國人大代表嘅基本法推介聯席會議主席李宗德就話，本來珠姐好堅持要嚟，但佢就勸珠姐留番喺屋企，多啲休息好過喎。我哋喺度祝珠姐快啲好番，重出江湖！