政情：黃偉綸放假避風頭
上星期五（十三日）對傳媒來講，絕對係「黑色星期五」，政府有預謀地主動引爆連串新聞，先有副局政助嘅薪酬檢討結果，再公布港台顧問委員會名單，財政司司長曾俊華仲突然殺出嚟，公布「三招十四式」穩定樓價措施，搞到記者做到冇停手，政府新聞處肯定都唔會得閒。雖然手下忙到爆，但有份炮製呢個「黑色星期五」嘅新聞處處長黃偉綸（Michael），隔兩日後即刻放長假近個月，由本月十五日放到下月十日至返工，避開「黑色星期五」餘波，認真識歎！不過就做死呢段時間幫佢署任嘅兩位副處長嘞。
通常立法會休會呢兩個月，都係議員高官放假旺季，但呢個暑假風波不斷，相信市民都唔希望班高官仲放咁耐假。之不過高官有嘢唔做放假抖暑，Michael都唔係第一個。早前搞停車熄匙立法搞到滿城風雨、保護大浪西灣又無功而還嘅環境局局長邱騰華，都施施然放一個月假。今次Michael有樣學樣，小心一復工就畀人圍攻喎！