政情：梁美芬倡政助改名
十八名副局政助表現不濟兼屢爆醜聞，政府卻逆民意而行，決定對佢哋一刀切凍薪，無減佢哋薪，愛佢哋變害佢哋，減人工或可紓緩吓民憤，依家全城鬧爆，等如將十八人放上刀尖口成為箭靶。
專業會議尋日見煲呔曾，提交施政報告建議時，就叫政府研究係咪繼續保留政助職位，據聞，政府認為三層委任層級相對外國嘅官僚體制已算精簡，又唔認同班政助唔值每月攞十幾萬蚊，即係政助仲有排玩。與會嘅梁美芬大膽提議，政助唔取消，不如改名啦，正名叫「助理局長」，提升權責同能力要求。聽起上嚟，總好過政府每月用百幾萬元請「助理」吖。
副局政助成為政府負資產，建制派幫手度橋拆彈，算係正路。不過，叫政助改名，都係攞嚟搞嘅啫，等如迷信改名轉運，換個名就風生水起？世上邊有咁嘅事。副局政助根本唔應該存在，一刀斬晒佢哋就差唔多！