政情：大輝帶C18訪台取經
以立法會廠商會代表林大輝為首嘅社區組織「C18」尋日展開台灣之旅，一行廿幾人首次走訪高雄同台北，趁年底市長選舉前，同市長選舉候選人見面，交流選舉策略同經濟發展意見，順便偷吓師。
拜會「鐵的康乃馨」
C18一行尋日朝早九點起程飛高雄，先去當地市議會同高雄最年輕嘅市議員藍健菖見面，交流吓年輕人參政嘅好與壞。之後就同國民黨高雄市市長候選人黃昭順會面，討論選舉工程同經濟等議題，大輝仲喺呢短短一個鐘度成功偷師添！
大輝話黃昭順喺台灣有個外號，叫做「鐵的康乃馨」，因為佢既有柔情又有堅毅嘅一面，佢嘅所有選舉宣傳都配合呢個外號，令人一睇難忘。大輝盛讚黃昭順嘅宣傳短片好溫馨，事關佢為表現自己剛中帶柔，搵咗囡囡幫手拍宣傳廣告，由囡囡嘅角度講番阿媽嘅從政精神，短短兩三分鐘就已經深入民心，仲好易吸到婦女票添。
不過香港電子傳媒仲未可以播政治廣告，如果大輝想將台灣呢套宣傳手法用喺香港，就要爭取改例先嘞！