中環出更：國際御廚攜眷勁擦阿一名菜

八重菊歎特級拖羅

國際御廚同「鮑魚大王」楊貫一淵源深，「一哥」○九年獲該協會選為「御廚中的御廚」。廚界老友來港，一哥前晚六點幾喺有份投資嘅八重菊設宴，請一眾廚神勁擦新鮮特級拖羅、藍鰭金鎗魚、油甘魚、極品日本白梅貝等。

新鮮魚生當前，御廚們食到舔舔脷，英女王伊利沙伯二世嘅御廚Mark Flanagan更入鄉隨俗，揸筷子夾壽司，真搞鬼。

刺身宴只係前菜，眾人食完刺身，七點四十五分再拉隊去一哥間富臨飯店食晚飯。臨上大巴前，摩納哥阿爾貝二世親王嘅御廚Christian Garcia嘅太太到iSquare商場內有間希臘品牌首飾店Oxette，一個箭步衝上前買水晶耳環。老公見大隊已上晒車，惟有施軟功催促太太走人，但女人買嘢大過天，一於速戰速決，用兩分鐘時間扑錘購入一對球形白水晶耳環，盛惠一千三百八十元，畀錢時笑唔停，十足執到寶咁興奮！

部分御廚原來係初次來港，玩得特別投入，當抵達銅鑼灣富臨門外，拿拿臨影番張「到此一遊」合照，其中一位御廚更趴喺地扮做掌上壓，氹到眾人哈哈大笑。

總廚林啟勛（前左二）及老偉波（前左三）獲頒國際御廚協會尊貴廚服。	特級拖羅	日本白梅貝
摩納哥親王御廚Garcia嘅太太（右二）睇中水晶耳環，Garcia（右）就催促佢趕車。	放大圖片	掛住買嘢，Garcia太太（右二）同大隊走失咗，好彩撞到「八重菊」太子爺Eric（右三）帶路，Garcia（右四）鬆一口氣。
富臨飯店 「一哥」（左二）請食鮑魚，場面熱鬧，打呔者為「富臨」執行董事邱威廉。	「一哥」鮑魚	釀焗蟹蓋

重視環保唔食魚翅

入到富臨，熱哄哄菜式已預備好。一哥擺咗六圍，請班御廚及家屬食飯，菜式包括「廿八頭鮑魚」，「當紅炸子雞」、「豉油王焗中蝦」、「釀焗蟹蓋」等。要煮餸招呼超級廚神，有冇壓力？見慣大場面嘅一哥淡淡定話：「好輕鬆，唔緊張。」唯一要注意嘅係，外國廚神重視環保，唔食魚翅，所以一哥冇預呢味菜。

八重菊老闆同一哥盡地主之誼款待御廚，認真唔話得，國際御廚協會創辦人兼秘書長Mr. Gilles Bragard前晚親手送贈尊貴嘅國際御廚廚服畀「阿一海景飯店」總廚林啟勛及八重菊總廚老偉波，八重菊太子爺陳志豪（Eric）就獲頒國際御廚協會榮譽會員殊榮，表揚佢對美食界嘅貢獻。

卓妮