法治明顯失分 一巴摑走信心

終審法院常任法官包致金姪女三度襲警皆輕判，隨即激起全城公憤，憤到有熱血怒民上街遊行示威嗰隻。而根據香港大學民意研究計劃最新調查顯示，「法治指標」評分明顯下跌。唔使問阿桂，法治失分當然同輕饒權貴有莫大關係。所以話啫，法官姪女嗰一巴掌確係力發千鈞好狠勁，唔單止可以摑到男子漢警員頭暈眼花，而且摑到七百萬市民信心動搖！

港大民調嘅具體數字係咁嘅，喺五大核心指標方面，以零至十分為標準，受訪者對「自由」評分最高，得七點五二分；其次係「繁榮」，得七點零九分；然後係「安定」、「法治」同「民主」，分別有七點零六、六點六一以及六點五七分。

「民主指標」雖然敬陪末席，不過實際上就升咗零點五八分。至於「法治指標」咯喎，雖然唔係包尾大幡，不過實際上就跌咗零點二七分。簡而言之，民主好咗，法治差咗。所以民意研究計劃總監鍾庭耀就分析話嘞，相信與立法會通過二○一二政改方案，同法官姪女襲警案有關。

至於兩項法治次要指標，法庭公正程度得六點一六分，劇跌一點二四分，創出歷史新低；制度嘅公平程度就錄得六點零六分。

計功夫茶話齋，法治明顯失分仲有另一項因素。大家記唔記得遊行示威抗議司法不公之前，公民黨黨魁、立法會議員兼資深大律師嘅余若薇點講呀？佢話「示威可能引致藐視法庭」喎，嚇到小市民鼻哥窿冇肉，否則示威人數可能更多。

呢嗱，呢啲咪就係叫做白色恐怖囉，平民百姓示威抗議司法不公假如真係被控以藐視法庭罪，咁同以言入罪文字獄有乜嘢分別？請記住，包致金冇幾多個姪女o架咋，唔係法官親戚嘅示威者一旦捉上法庭受審，肯定唔會咁好彩從輕發落啦！

咦咦咦，咪住先，功夫茶好似講錯咗少少，唔係一個刁蠻港女嘅纖纖玉掌摑走市民對於司法嘅信心，而係一個刁蠻港女加一個政客港女齊齊發功，你出手時我出口，先至可以造成咁大嘅破壞力。

既然法治明顯失分，市民信心動搖，咁點算好呢？冇辦法嘞，功夫茶為民請命，一於冒險摑一摑相關人等，一二三總共摑三巴。

第一巴要摑醒法官姪女，好心你唔好郁啲就打差人啦，人哋都有阿媽生o架！

第二巴要摑醒余若薇，好心你唔好助紂為虐啦，小市民如果失去言論自由會好痛苦o架！

至於第三巴咯喎，呢一巴最危險，萬一被控藐視法庭都唔知點算好……不過死就死啦，爭取公義萬死不辭，呢一巴要摑醒司法機構，好心你唔好亂咁發放錯誤訊息，判案唔該公正嚴明，香港人如果失去法治精神會好悲哀o架！