政情：黃進達日做十幾粒鐘
康泰旅行社太子爺黃進達（Jason）下月初就坐正康泰總經理個位，正式接爸爸黃士心嘅班。尋日佢首次主持一年一度嘅狀元旅遊萬里行誓師大會，Jason話，呢排正逢旅遊旺季，佢日做十幾個鐘，都咪話唔辛苦。
Jason係康泰旅行社董事長黃士心長子，雖然依家卡片上仲係印住董事頭銜，但唔使半個月後就坐正㗎啦！太子爺接班，如果想要獲得外界掌聲，自然要付出比一般人更多嘅努力，Jason都明白呢個道理。
喺爸爸悉心安排下，Jason已經開始涉獵社會公職。佢同時出任中華總商會、潮州商會嘅會董兼青年委員，係工商界不可忽視嘅生力軍。Jason就咁忙碌，好彩佢好識得平衡，佢話自己鍾意打籃球，就算工作幾忙，都會盡量抽空健身，加上經常同屋企人保持溝通，又或者把臂外遊，Jason有壓力都唔會係孤軍作戰啦！