政情：尹德勝影模o靚眼看手勿動
前香港廠商聯合會會長尹德勝退下火線後專心玩相機，最近迷上影人像，尋日佢見記者時講起上星期跟咗去g模鼻祖周秀娜（Chrissie）帶團嘅廣東德慶「盤龍峽g模攝影團」，影足千幾張相返嚟，依家仲未執好。尹德勝仲自爆，曾經靜雞雞同Chrissie和DaDa講：「過嚟同Uncle影張相吖！」佢哋兩個都好爽快咁應承，但搭住佢哋膊頭時就畀在場嘅工作人員制止，即係咪多手！
見記者怕尷尬快閃
尹德勝話影人像好高難度，要模特兒同天氣都配合先影到靚相，要多練習，難怪當朋友問佢有無興趣參加盤龍峽攝影團時，佢一口答應。尹德勝指個團都幾舟車勞頓，車程加船程超過六個鐘，但之後可以影足兩日相，都幾抵。
今次同行有七個o靚模，團費不過二千幾蚊，就可以影到夠，抵到爛！不過尹德勝就話唔係個個都識擺甫士，加上工作人員劃嘅攝影區有時背光，所以啲相幾難影喎！尹會長仲幫佢哋講說話，叫大家唔應該歧視o靚模，應該當係一份正當職業咁看待。不過一到攝影團嘅記者採訪時間，尹德勝就即刻閃人，話費事畀記者認到會尷尬喎。既然都話o靚模係正當職業，點解又怕咩畀人知呢？怕畀人知又為乜講出嚟呢？