政情：Eva鄭遊埃及囡囡嗌辛苦

運輸及房屋局局長鄭汝樺（Eva）向來都係廿四孝媽咪，去年為遷就兩個囡囡做暑期工及上暑期課程，延遲到八月中才放大假去旅行。今年都唔例外，Eva為參加大女喺美國波士頓嘅大學畢業禮，提早到六月初放大假，之後一家去咗埃及旅行。不過，據聞佢兩個囡囡大呻又熱又辛苦。
鄭汝樺（中）同兩個囡囡遊開羅吉薩（Giza）金字塔期間，老公同佢哋影相留念。 （鄭汝樺提供圖片）
鄭汝樺（中）同兩個囡囡遊開羅吉薩（Giza）金字塔期間，老公同佢哋影相留念。 （鄭汝樺提供圖片）

氣溫攝氏四十幾度

可能Eva喺寫字樓坐得太多，所以去親旅行都要揀活動量較多嘅地方，好似幾年前就去北美阿拉斯加騎馬，上山落山周身用力都咪話唔辛苦，點知今次仲激到喺夏天遊埃及。

鄭汝樺（右二）一家四口暢遊Kom Ombo神廟，戴晒太陽帽同太陽鏡做足防曬。
  • 鄭汝樺（右二）一家四口暢遊Kom Ombo神廟，戴晒太陽帽同太陽鏡做足防曬。

埃及呢幾個月嘅天氣最熱，氣溫高達攝氏四十幾度，酷熱難當，難怪Eva兩個女都大呻今次旅行又熱又辛苦，唔驚太陽曬黑啲皮膚都算係咁囉！

不過，睇番Eva啲埃及旅行相，見到佢哋一家人樂也融融，遊完首都開羅著名嘅吉薩（Giza）金字塔後，又到亞斯旺坐遊船暢遊尼羅河及沿途多個神殿，其中一張全家福就喺宏偉嘅Kom Ombo神廟門外所攝，一家四口個個戴晒太陽帽同太陽鏡，做足防曬措施。