政情：四散人綑綁式叫價
立法會五散人以鬆散形式合作，但一場二○一二年特首選舉，兩名疑似候選人「唐唐」唐英年同行政會議召集人梁振英（CY）磨拳擦掌，令其中兩名「散人」廠商會代表林大輝同會計界陳茂波（Paul）處境尷尬，事關一個被視為唐唐「家臣」，一個曾經被傳押注CY，二人立場迥異，令五散人散上加散。雖然後者已經出嚟否認，但前者變相默認，所以五人喺現有組合下好有機會演變成「1+4」格局，即大輝撐唐唐，其餘四人，即「IT豪」譚偉豪、阿Paul、保險界陳健波同「怪醫」梁家騮就會走埋一齊，至於投向嘅陣營，則睇定啲喎！
五散人○八年開始以鬆散模式聚合，外界以為佢哋會慢慢愈走愈埋，一直向以前嘅「早餐派」或者「泛聯盟」模式轉移，但事實係，五散人嘅鬆散程度至今無顯著變化，而且隨着特首戰臨近，大輝嘅明顯立場，同其他四散人嘅對立位置肯定愈見尖銳，五散人可能因而變得更散更分離。
不過，五散人之一嘅IT豪話，大家少同佢哋擔心。IT豪強調，現時五散人中，除咗大輝因為打過唐家工而角色較為敏感同尷尬之外，其他四位散人，包括阿Paul、陳健波、怪醫同IT豪自己，對特首候選人或者疑似候選人都未有任何取態，一切要視乎有心人日後「亮劍」時所提嘅選舉政綱同拉票攻勢，再作出抉擇。為咗增強政治能量，四人極大機會綑綁一齊，作為向未來特首候選人叫價嘅籌碼，為界別爭取權益。
儼如專業界別主流聲音
IT豪嘅如意算盤係，阿Paul、陳健波、怪醫同IT豪各自代表不同專業，分成四件「散件」，力量有限，但如果集結起來，政治能量大不同，儼如代表立法會內專業界別嘅主流聲音，象徵性極大，佢哋對特首候選人嘅取態，相信對特首選舉委員會內約三百張專業票有一定導向作用。喺咁嘅大前提下，佢哋四個一定會綑綁一齊。
散人不散，的確可提高身價，待價而沽。不過，點講五散人都係愈嚟愈散喎。按IT豪嘅邏輯，唔排除五散人可能會共同進退撐同一個候選人，但特首人選未明朗之前，現階段好大機會出現一個局面，就係大輝挺唐唐，其他「四散」玩飄忽，睇定啲先至諗支持邊個候選人，咁就變成「1+4」格局嘞！