由八達通率先引爆嘅出賣私隱醜聞不斷升級，私隱防線全面崩潰，破壞程度同甘肅舟曲特大泥石流簡直有得揮，變成一場超級私隱大災難。
金融管理局前日確認，本港有六間銀行過去五年曾經將客戶資料交畀保險公司，涉及嘅儲蓄戶同信用卡客戶超過六十萬，其中五間銀行承認透過「賣料」掠水。
八達通賣咗兩百萬人私隱，依家銀行又賣咗六十萬人私隱，市民好似被人剝晒光豬咁，乜都冇得剩。仲有呀，呢啲可能只係冰山一角嘅咋，尋日係八達通出事，今日係銀行爆大鑊，聽日又唔知輪到邊間機構，私隱災難到底有幾大？仲有幾多漏洞未發現？仲有幾多醜聞未揭發？政府矇查查，連私隱專員都烏Sir Sir，問你驚未！
仲有更得人驚㗎！呢嗱，透過轉賣客戶資料牟利嘅幾間銀行係乜水，金管局身為監管機構，居然話基於銀行業條例所限，唔可以披露涉事金融機構名單，要市民自己向銀行查詢喎。
有冇荒謬啲呀？銀行將客戶資料出售圖利，市民無端端做咗豬仔，竟然無權知道係邊間銀行，咁仲成世界嘅。只准銀行賣私隱，不准百姓討公道，呢啲係乜嘢邏輯吖？呢啲係乜嘢王法吖？金管局不如改埋名叫「銀行牟利保障局」啦，笨！
出賣私隱唔係啱啱發生，問題已經存在多年；涉及嘅銀行唔係一兩間，而係六間；受影響嘅客戶更唔係十個八個，而係六十萬咁多，金管局好明顯係監管失職啦。但局方竟然以過往甚少收到客戶投訴為由推卸責任，仲話「用倒後鏡睇嘢個個都好聰明」，完全唔知反省，簡直豈有此理！
講真，由八達通出事到家陣私隱保障處處失守，有邊個部門唔係卸得就卸吖？八達通被揭發出賣客戶資料，作為最大股東嘅港鐵、代表政府出任港鐵董事嘅高官，統統以「唔知」為藉口置身事外，淨係搵個滿口大話嘅八達通行政總裁陳碧鏵以「辭職」自我了斷就想過骨。唉，一個二個縮骨走精面，旨意佢哋堵塞漏洞，保障市民私隱，好難咯。
醜聞接連爆煲，市民忍無可忍，紛紛要求政府快快做嘢。有政黨嘅調查發現，七成五受訪者認為港府需要設立獨立委員會徹查事件，還市民一個公道。有立法會議員話會動議辯論要求政府全面徹查各行業有冇出賣客戶資料，並修例將出賣個人資料刑事化。嗱，睇下當局呢次又避得去邊？
講開又講，出賣客戶私隱牟利變成無處不在嘅「風土病」，首先係因為政府廢，冇監冇管；其次係條例廢，《個人私隱條例》甩漏多多，根本保障唔到市民；最後私隱公署更加係廢柴，問題存在咁多年，依家先至如夢初醒，簡直形同虛設。
三廢不除，私隱難保。唔該官老爺快啲修例，堵塞法例嘅漏洞，唔該班議員對出賣市民私隱嘅機構追究到底，千祈唔好再虎頭蛇尾呀。至於私隱公署咯喎，既然咁廢，不如摺埋佢喇！