政情：田少歎奶茶杯杯好飲
茶同酒都係唔少人嘅心頭好，有啲人會同時迷上佢哋，有啲人則只揀其一，好似旅發局主席田北俊咁，就係後者；對紅酒相當有研究嘅佢，對港式奶茶就未有深入了解。尋日田少、貿發局副總裁方舜文同餐飲聯業協會會長黃家和一齊出席會展舉行嘅《國際金茶王大賽2010》港式奶茶香港區決賽，即場試飲各準茶王嘅參賽作品。
平時品酒好有心得嘅田少，問佢點為之一杯好奶茶，佢坦言呢樣嘢考起佢，事關佢無咩研究，唔似得紅酒咁，可以品嘗到香味、醇度同aftertaste。不過佢平時都有去茶餐廳飲奶茶，話只要入口覺得好飲就係好飲，所以試咗兩個參賽者作品嘅佢，直言分唔到邊杯好飲啲，總之兩杯都咁好味喎。咁又係，入得決賽，當然有咁上下質素！
至於方舜文，就鍾意濃啲、香啲同滑啲嘅奶茶，但佢唔係成日飲，撞啱周末下午有假放，佢就會去茶餐廳歎番杯奶茶。依家成日要周圍飛宣傳香港經貿平台嘅佢，話去到外地，都會試吓當地嘅奶茶，佢覺得溫哥華拍得住香港，美國就麻麻地，所以每次去到唔同國家嘅茶室，都會推介吓港式奶茶。