政情：邱騰華放長假扮勤力
環境局局長邱騰華強推停車熄匙立法，被搵食車司機狠批脫離現實，至今仲未達成共識。點知一波未平，一波又起，西貢大浪西灣自然景觀早前遭破壞，被環境團體狂烈炮轟，依家仲有待善後，不過邱局長竟然施施然放約近一個月大假，由本月四日一直放到下月二日，中間只係返咗一、兩日，放假期間由副局長潘潔署任局長職務。
唔知係咪邱局長自己知自己事，唔敢將放成個月大假嘅事一次過公告天下，要將假期斬開分兩次刊登政府憲報，放假期間仲要扮勤力參加一個有關大浪西灣保育嘅研討會，搞到政府憲報要刊登勘誤，亂晒龍。
連民政事務局副局長許曉暉都要做替工，處理德成局長嘅職位四日，由今日頂到下星期二。教育局局長孫明揚就喺本月十八日離港公幹四日，期間由副局長陳維安暫代局長職務。
不過，運輸及房屋局局長鄭汝樺今個暑假到年尾都未必有假放，一來要睇實十月菜園村清場，二來復建居屋討論熾熱，到時要出來解畫，所以佢兩個月前已提早放大假，去咗埃及旅行。