政情：保良局玩具圖書館巡迴全港
保良局主席呂鈞堯（Quincy）上任後構思多，下月將推行全港首創「流動玩具圖書館」計劃，巡迴全港各區，借玩具畀小朋友玩。
蔡太斷筋要戴護托
保良董事局成員日前同傳媒午宴，Quincy大談工作大計，佢話以流動車運載玩具巡迴各區，創意十足，市民有合適新淨嘅玩具，不妨捐畀佢哋喎。除此之外，嚟緊九月十一日將舉行一年一度嘅「星光熠熠耀保良」籌款節目，有排忙嘞。但幾忙都好，早前Quincy趁暑假遊北海道，大玩激流同落山單車，睇唔出Quincy原來幾玩得。
保良第一副主席龐盧淑燕就與大仔及孫兒啱啱去完東京歎世界，龐太鍾意去日本食嘢，大擦壽司、魚生、頂級和牛及日式火鍋，一去六日，孫兒佢哋留多四日，玩埋迪士尼至返嚟。
午宴上，仲有身兼保良總理嘅玩具大王蔡志明太太蔡李惠莉，見蔡太右手尾指包上紗布及護托，細問之下，原來係尾指一截筋斷咗。蔡太話連自己都唔知幾時整親，近日發現尾指頭無晒力，先知受咗傷，醫生叮囑佢戴護托兩個月，等斷咗嘅筋自行修復，卓妮喺度祝願蔡太早日康復！
