最近有三位女性同胞人氣急升，風頭一時無兩。第一位係導遊阿珍，鬧人金句傳遍全國，簡直紅透半邊天。第二位係法官姪女，掌摑警員清脆利落，最勁係唔使坐監。第三位係八達通女強人陳碧鏵小姐，出賣客戶私隱竟然獲利四千幾萬，財技之高令人拍案叫絕。
不過可惜吖，財技高超唔等於合情合理合法，祈福黨呃神騙鬼都算財技高超啦，咁唔表示大話精騙徒可以逍遙法外吖嘛，除非啱啱遇着剛剛有個親戚做法官嘅啫。所以咯喎，陳碧鏵小姐唔好彩嘞，千夫所指不特止，仲要引咎辭職。
八達通非執行主席梁國權昨晚表示，接受行政總裁陳碧鏵辭職，半年後生效。引咎辭職呢家嘢人人都明白係點解，做錯事梗係要孭鑊o架啦，之但係，乜嘢叫做半年後生效？點解可以留任至明年二月？嗱，你千祈唔好話戴罪之身都有資格做到夠鐘先至走人，順手攞埋約滿酬金，私隱被賣到好似剝光豬咁嘅二百萬受害者會嬲o架！
梁國權又話，有關出售客戶資料所得四千四百萬元利潤將會捐畀公益金，假如日後發現有更多利潤亦會全數捐出，呢位哥哥仔仲代表董事會再次向市民鞠躬道歉。又捐錢又道歉，大家收唔收貨呢？咦，咪住，二百萬苦主未見有任何賠償喎，所以功夫茶支持民協入稟小額錢債審裁處，追討八達通對市民所造成嘅「感情損失」。所謂追討感情損失，意思係話雖然市民冇蒙受實質金錢損失，不過畀人靜雞雞出賣私隱傷感情吖嘛，所以八達通都要賠償。
陳碧鏵既然眾望所歸冇得留低，另一邊廂負責保障個人資料免受侵犯嘅私隱專員又點呢？之所以提出呢個問題，事關審查八達通嘅原任私隱專員吳斌啱啱好離任，叮一聲消失咗，換上新任專員叫做蔣任宏，即係郵政署前署長。本來呢，長江後浪推前浪，一代新人換舊人，新陳代謝好平常，不過蔣任宏其實係一個惹火尤物，未上任已經備受爭議，一上任即刻萬箭穿心。
尋日喎，民主黨成員趁蔣任宏履新走到去灣仔個人資料私隱專員公署辦公室外抗議。抗議嘅理由係蔣任宏掌管郵政署期間，長沙灣郵局曾經發生過針孔攝錄機監視員工醜聞，反映呢條友仔唔重視私隱，其身不正冇資格做私隱專員。
話時話，蔣任宏狡辯能力都幾高o架，佢話喎，正正係因為發生過針孔事件，所以對於保障私隱產生強烈興趣。
如果咁嘅歪理都可以成立，陳碧鏵就發達咯，假以時日又可以搖身一變成為私隱專員，大條道理表示，正正係因為發生過八達通出賣私隱事件，所以對於保障私隱產生比蔣任宏更強烈嘅興趣！
計功夫茶話齋，蔣先生唔好死撐嘞，順應民意執包袱走人啦，畀你撐得一時，唔通撐得一世咩？新專員弊在理虧，日後一定會不斷受到質疑，保障私隱肯定自廢武功啦，一旦類似八達通醜聞再次出現，剝晒光豬嘅小市民搵邊個出頭呀！