中環出更：呂鈞堯揀Hermes做保良局呔
「包中之王」Hermes手袋令名媛淑女為之傾慕，Hermes出品嘅領呔，令保良局主席呂鈞堯（Quincy）亦為之欣賞，欽點Hermes做今屆保良局局呔，尋日為慶祝關帝寶誕，總理黃英鵬、薛嘉麟、副主席陳永錕、顏金煒等清一色戴上Hermes紅呔出席祭祀典禮。
每條千六元
保良嘅局呔年年換款，Quincy同幾位副主席左揀右揀，還是覺得Hermes領呔最醒目，一口氣預訂幾百條真絲紅呔，條呔背後寫上PO LEUNG KUK（保良局）三個字，別具代表性。
Hermes呔質料滑不留手，人見人愛，Quincy靈機一觸，諗到用條呔嚟籌款，公開畀市民訂購，每條一千六百元，想買嘅善長可以聯絡保良局籌募部。
Quincy對潮流觸覺敏銳，全城熱搶嘅iPhone4，佢都託朋友喺歐洲買咗一部，盛惠四百歐元，約四千多港元。新機日前到手，尋日急不及待向副主席鄭錦鐘（Eric）展示新機，顯得好興奮。Eric都唔執輸，手上攞住部iPad，大讚畫面靚，睇文件一流喎。