政情：王征自認人肉彈引人注目

隨時正式入主亞視嘅內地商人王征，尋日以主人家身份出席亞視活動時繼續語不驚人誓不休，自稱係「人肉炸彈」，笑言就如同事所言，佢若現身一定吸引大批傳媒追訪。佢又話為咗吸引贊助，其實就算亞視唔叫佢都會不請自來，之但係隨後同場嘅曾憲梓認頭話要贊助，佢又竟然話暫時唔能夠接受，恭敬但不從命喎，呢位大老細嘅心意，真係估佢唔到。