中環出更：陳南祿獨愛紅呔夠醒神
大家細心啲就會發現，新任恒隆集團董事總經理陳南祿（Philip）對紅色領呔情有獨鍾。早前卓妮喺個酒會見到笑容滿面嘅Philip，今次佢戴咗條「泊」滿晒飛機嘅Alfred Dunhill紅色呔，神采飛揚。佢條呔上邊好多飛機圖案，襯晒佢做咗國泰航空行政總裁多年嘅經歷，睇嚟佢對國泰依然念念不忘！
Philip同卓妮講，條呔係朋友幾年前送嘅，款式好舊㗎啦！講到興起仲自爆買呔獨愛紅色，因為貪佢襯到個人精神啲。卓妮睇番近十幾年來嘅舊相，佢打呔真係一向獨沽一味愛紅色。
呢條Dunhill售價約一千元。Dunhill係英國百年歷史名牌，佢哋每季會為領呔設計唔同主題圖案，好似老爺車、飛機等等，今季新款有士巴拿、鉗等小工具，襯番佢哋以生產車頭燈等用品業務起家嘅特色。
講番Philip，佢離開打咗卅三年工嘅太古集團，呢世人第一次換老闆，尋日正式去恒隆返新工，唔知佢係咪又戴番條紅色靚呔呢？
卓妮