立法會議事廳裏面嘅火藥味愈來愈濃，政府官員出席會議經常成為箭靶，大家見怪不怪。儘管如此，政務司司長唐英年（唐唐）早排忍唔住向內會主席劉健儀投訴，話如果再發生官員被議員侮辱場面，官員有可能拉隊離場咁話。件事點發展仲要睇落去，但畀人投訴嘅社民連尋日又將炮口對準唐唐，仲重提佢嘅「條條fing」事件添。
立法會下周三將會喺休會辯論時段，討論防止塌樹方案，好多議員都希望負責領導有關跨部門小組嘅唐唐屆時親身出席，但政府到依家仲係傾向搵發展局局長林鄭月娥出嚟應付議員，搞到社民連陳偉業（大舊）好不滿，尋日喺內會炮轟唐唐唔出席會議係唔尊重職責同立法會，佢話既然司長係負責管理樹木嘅最高領導，冇理由推推搪搪、扭扭擰擰，只係識得「條條fing」喎。
大舊愈講愈興奮，話司長只係得把口，講就天下無敵，行為就極之醜陋，立法會應該譴責埋佢添。
唐唐早排投訴社民連件事仲未完，大舊今次借內會發言機會再向司長開火，唔知唐唐又點回應呢？