政情：憲報又出錯尷爆道歉

政府出醜唔係第一次嘞，年前刊錯憲，誤將民政事務局局長曾德成私人休假，寫成離港公幹，由副局長許曉暉署任，結果被本報踢爆搞錯咗。話口未完，又擺多一次烏龍。七月一日政府公布委任八十七名太平紳士咁大件事，竟然冇對清楚就將資料出街，仲揸主意幫劉鳴煒「改名」添。

委任名單中，亦出現疑似錯名之誤，話說「百仁基金」成員陳寧濘亦獲委任為太平紳士，但喺政府憲報中，陳小姐個名少咗「三點水」，行政署就解釋話，陳小姐身份證上確係寫上「陳寧寧」喎。連委任太平紳士都搞出咁多風波，認真無謂！