政情：阿Paul鼠王芬齊食檸檬
近日接連發生幾次老鼠咬人事件，靠滅鼠起朵嘅立法會議員「鼠王芬」梁美芬尋日喺立法會內務委員會提出，希望喺嚟緊星期三作出緊急質詢，並要求政府派人解畫。除咗鼠王芬之外，旅遊界議員謝偉俊（Paul）尋日亦要求喺同一日作出緊急質詢，討論近日又發生嘅內地旅客被強迫購物事件。
鼠王芬話對於上次食衞局副局長梁卓偉嘅回覆好不滿，而且暑假就到，擔心事件一拖再拖令市民更擔心。至於阿Paul亦都話暑假將近，而且臨近十．一黃金周，會有好多遊客到港，所以要快手快腳搞掂件事。
表決嗰陣，鼠王芬仲要求署名投票，但最終都係過唔到，五十位與會議員以大比數三十五比十否決鼠王芬個動議，阿Paul嗰個亦唔好得幾多，與會五十一個議員中只有十一個贊成，反對嘅同樣係三十五個，兩個緊急口頭質詢要求雙雙否決，大家齊齊撞板。喺兩次投票中，好多建制派議員都投咗反對票，冇面畀，但劉皇發、詹培忠、林大輝、陳健波及譚偉豪就投咗棄權票，算係手下留情！