政情：蔡冠深派利是氹人瑞
由中華總商會會長蔡冠深牽頭搞嘅「中總愛心行動」，尋日出動探訪幾位百歲長者，蔡會長包定利是、禮物，又請晒三百位長者飲茶。與耆英同樂有原因，原來今年係中總110周年，蔡冠深話，賀長者，即係賀埋中總喎。蔡冠深與副會長張成雄等人，尋日去到黃大仙嗇色園可蔭謢理安老院，向全院年紀最大嘅一百零五歲人瑞譚婆婆送上利是，其餘六名百歲長者都有份。咁識敬老，一班公公婆婆都識做，向中總獻唱番首生日歌。
喺長者面前，蔡冠深睇落係最後生嗰位，佢笑言自己有一百一十歲，同中總同齡，但心境就係三十歲，希望中總同佢一樣，繼續活力十足。講開又講，原來蔡冠深夫婦同三個囝囝啱啱去完上海世博，之前佢去過兩次嘞，但好多館仲未踏足過，於是把握機會喺兩日內橫掃廿五個館，攰到夜晚返酒店要不停按腳。
中總一百一十歲生日，慶祝節目陸續來，位於中環干諾道中嘅中總總壇，經八個月大執後終於完工，下周五舉行新貌開幕禮。據聞呢個月底，仲會請埋中國六位太空人包括首位太空人楊利偉訪港，請得郁六位「飛人」來港，面子都唔細。