政情：嫻姐或出山爭超級議席

葉劉認老唔選特首？

五個區議會「超級議席」魅力非凡，前保安局局長葉劉淑儀亦透露考慮出戰。佢尋日話，若然成真，要先喺下年區議會選舉跑出，首選港島山頂區，或與公民黨陳淑莊對撼。不過，佢都係嗰句，未有決定。對有傳自己出戰「超級議席」，目的為一二年選特首，今年踏入耳順之年嘅葉劉話：「到時我都老啦！」一招太極拳耍過去。

葉劉揚言考慮競奪「超級議席」，到底係為喺政途更上一層樓，定係騰出港島直選議席、畀匯賢智庫拍檔史泰祖接棒呢？外界揣測頗多，不過，尋日一名建制派資深議員分析，葉劉最終選「超級議席」嘅機會好細。理由係，要喺全港五大區合共攞二十萬票先至穩勝一席，非外界想像般容易；若無龐大地區樁腳網絡同選舉機器配合，單憑一己知名度，勝算極微；葉劉為人自信，但唔笨，應該心中有數。

按勢力版圖，五席「超級議席」，建制派同民主派應各取兩席，最末一席選情咬緊，但根據過往選舉嘅「六四黃金定律」，以民主派稍佔優。對建制派嚟講，最夠資格落場拗手瓜嘅，係民建聯同工聯會，民記必借勢捧新人，工聯亦好想分一杯羹，唔想只做轎夫，為人作嫁衣裳。工聯內部開始游說嫻姐出戰，雖然嫻姐表現得無乜興趣，但一名工聯高層話，比起今年三、四月游說嫻姐出戰「五區補選」，今次應該易些少，事關補選嫻姐未必穩勝梁家傑，兼且咁辛苦贏咗只係做兩年議員，同「超級議席」不可相提並論。

況且，地區直選新增五席，工聯內除ＫＫ同王國興分別喺九龍東同新界西競逐連任外，葉偉明落新界東、潘佩璆戰港島嘅可能性大增；若然嫻姐出山，全港巡迴表演，可發揮「膽拖」作用，順便為四區造勢。到底嫻姐肯唔肯出山，大家慢慢等吓。