中環出更：發嬸買新樽派酸薑益議員
每年端午節之後，係子薑最靚嘅季節，鄉議局主席劉皇發太座吳妹姝又出動炮製「發嬸牌」酸子薑益好友，最近分批浸咗百幾樽，上星期已分咗六十幾樽派畀班立法會議員。記得發嬸去年派薑時，呼籲大家響應環保，食完記得回樽；事隔一年，竟然無議員主動回樽，好彩發嬸去年做定兩手準備，預先訂定百幾個新玻璃樽，確保今年有薑派。
休會期間去三次旅行
發叔發嬸住開嘅屯門天佑居現正重建，暫居九龍塘，所以發嬸要老遠返去屯門青河坊搜羅靚子薑，但靚子薑唔係日日有，發嬸好有心，頻頻撲撲分幾次入貨，早前卓妮跟佢入屯門買子薑，當日就只係揀到十二斤靚子薑。發嬸將子薑搬返九龍塘住所後，就手起刀落不停咁切薑片，然後用頭米醋、白米醋及白糖浸，入樽後，再一樽樽放入雪櫃。
發嬸製酸子薑幫發叔廣結人緣，發叔做老公嘅當然心知老婆辛苦啦，所以嚟緊立法會休會後，佢會帶發嬸去三次旅行。第一程係本月廿九日參加詹培忠同陳鑑林發起嘅潮汕美食之旅，頭兩日先到潮陽、汕頭、潮安等名勝古蹟參觀，最後一日轉到普寧遊覽，尾站再到發叔家鄉惠陽探親。
八月初，發叔再同發嬸及仔女去東歐捷克布拉格等大城市旅遊，而八月尾再同鄉議局鄉紳到上海世博參觀，節目咁豐富，發嬸幾辛苦都抵番晒啦！
