中環出更：肥亨歎煨番薯回味舊情
卓妮今日要講一件奇事。話說早幾日同朋友喺中環食完午飯後，沿上環方向行到荷李活華庭附近時，離遠見到中策集團主席馬時亨喺度周圍望，個款似係搵緊地方，無耐就見佢入咗一間叫「中國龍」嘅舖頭，卓妮立即上前裝吓佢搞乜鬼，見間舖頭賣中國特產食品嘅，究竟肥亨買乜呢？
皮薄無渣 滑似蓮蓉
原來肥亨去買煨番薯。大熱天時三十幾度食煨番薯，搞乜呢？肥亨笑笑口話，自己離開政府將近兩年，諗起○八年七月十一日離職當日，同事知佢鍾意食煨番薯，特登去呢間舖頭買煨番薯同佢餞行，可惜當時太匆忙無嗒真啲味道，所以問啲舊同事攞番個地址，專程去買嚟回味吓。
肥亨買呢種煨番薯名為「北京極品糖心番薯」，特色係皮薄無根又無渣，香甜滑似蓮蓉，每磅廿七元，佢最後買咗三磅幾，原價九十元，但店舖老闆打咗個九折畀佢，盛惠八十元，肥亨準備攞啲番薯返去請生意拍檔中策集團副主席柯清輝食。
肥亨一向係番薯迷，黃心及紫心番薯都鍾意食，仲記得以前街邊小販用車仔推住個大鐵筒、用柴火煨嘅番薯最好味，但時代變咗，轉用焗爐，風味都唔同咗。講到煨番薯價錢，肥亨都素有研究，佢話最貴係日本，細細隻都要賣港幣四十元，但呢間舖頭賣廿七元一磅，認真抵食。
「中國龍」位於上環皇后大道中283號地下，標榜「專為嘴刁食家服務」，皆因中國特產種類繁多，除咗最著名嘅北京極品糖心番薯外，仲有賣「新疆有核紅肉西瓜」、炮彈芋頭、中國富士蘋果、爽甜嘅「三華李」梨子、傳統肇慶裹蒸糉等。
卓妮