政情：陳健波寸泛民死咬功能組別

立法會尋日繼續辯論政改方案，功能組別嘅存廢繼續成泛民抨擊目標。平時甚少動氣嘅保險業界議員陳健波都聽到動真氣，一輪嘴為功能組別平反。佢話功能組別選舉有問題係不爭事實，但廢除功能組別唔等於會天下太平，仲揚言如果功能組別收檔可以解決所有問題，佢聽日即刻辭職，仲話屆時可以搵更多錢，陪囝囝多啲喎。佢又不點名批評一啲泛民議員成日執住功能組別呢個議題借題發揮謾罵，打住民主旗號反民主，早知議會咁多爭拗，佢一定唔入去喎！