政情：蘇錦樑陳維安冇人識

立法會議事廳內議員一個接一個發言，冗長沉悶，蘇錦樑唔止一次去到以遮打花園為基地嘅支持政改陣營，同市民握手打氣，尋日中午十二點幾仲拉埋陳維安一齊去添。

撐政改嘅香港青年聯會有幾個年輕人即場奏樂唱歌，兩位副局經過忍唔住玩埋一份。蘇錦樑同陳維安二話不說攞嚟樂隊成員嘅鼓棍，起勢咁打起鼓上嚟，仲邊打邊叫「起錨」，有姿勢有實際咁打足五分鐘，自得其樂，但又確實幾有節奏感。

不過，樂隊其中兩位女成員竟然話只知道其中一人是教育局高官，但叫唔出名字；至於蘇錦樑來自邊個局，就更加唔知道。睇嚟兩位副局都係要努力啲，等公眾認識吓先得喇，或者組一隊「中佬Band」，都未嘗唔係妙計！