政情：戰前熱身曾余鬥做騷

煲呔曾自把自為單挑余若薇辯論政改，今月十七日開騷，過去一連兩個星期，佢更自導自演，擔綱上演政改「起錨」騷，面對一片噓聲，面不紅、耳不熱，高呼「起錨、起錨」，練到面皮成尺厚，練就一副嗌交戰鬥格，變相為辯論大戰偷步熱身，對手余若薇見勢色唔妥，尋日唔執輸，急急落區推銷自己，同煲呔曾一樣咁有騷味。

大狀忽然紆尊降貴

平日一身名牌衣飾、見慣富商政要嘅余大狀，尋日透過社區組織協會安排，紆尊降貴跑到深水埗嘅悶熱陰暗籠屋板間房，話要親身感受低下階層嘅生活情況。只見余大狀輕裝上陣，薄施脂粉，喺呢個全港最多窮人嘅社區陋巷視察，全情投入，同煲呔曾一樣，擺出一副好畀心機模樣。

之後，余大狀同在職貧窮人士、兒童、新移民、精神病康復者及露宿者等開會，聽吓大家講講公屋上樓慢、護老院輪候時間太長同託兒服務不足咁，開宗明義話要收集民意，帶入政改辯論之中。余大狀尋日拋頭露面，一雞兩味，評彈煲呔曾推銷政改無方向，無目標，落區連市民簡單嘅當面對質都答唔上，起錨騷簡直當市民傻嘅咁話。

煲呔曾尋日場「起錨」騷第二波喺「超嘈」抗議聲中上演，傳媒大書特書，醜態百出，但亦因為傳媒傾全力追訪，令余大狀落區變得好靜局，無乜聲勢，咁嘅結局，對曾、余二人唔知算唔算兩敗俱傷呢!?