中環耳目：劉錫威擦台南美食解鄉愁
近年台灣食品勁受港人歡迎，專賣台灣零食嘅舖頭愈開愈多，台灣駐港機構之一台北貿易中心應記一功！
早前卓妮喺黃埔新邨「南台灣原味新館」見到台貿中心董事總經理劉錫威，佢話雖然嚟香港工作三年幾，但依然有個台灣胃，經常落區去搵台式食肆以解鄉愁。
試三杯雞知高低
當日劉總見到餐牌就好開心，因為道道都係令人食指大動嘅台灣菜。佢好有心得咁話，要知道餐廳有冇保持台灣味道同水準，試吓三杯雞就無所遁形。佢又點咗台灣南部特色美食周氏蝦卷、薑絲炒大腸、破布子蒸鱸魚同埋魚丸湯，望住成枱台式美食，卓妮覺得好似去咗台灣夜市咁，不禁食指大動。劉總就盛讚佢哋嘅魚丸湯令人回味無窮。
劉總笑謂，近幾年香港人興起去台灣旅遊兼搵食嘅熱潮，對台灣小吃熟悉度已叻過好多台灣人。台貿中心係台灣外貿協會駐港單位，負責推廣台灣出口貿易，拜港人為食所賜，目前佢哋做得最有成績嘅係台灣食品推廣，加上台灣熟食店最近又掀起登陸香港熱潮，好似開到成行成市嘅珍珠奶茶店，令到港人隨時體會台灣夜市風味，佢見到咁墟冚嘅場面都好開心。
卓妮