政情：賴幸媛請港府食檸檬
台灣陸委會主委賴幸媛前晚首次以現任官職訪港，形容此行係破冰「登陸入港」，亦係台灣部會首長赴港嘅第一人，具有咁大歷史意義的事情，尋日先至曝光，港府對呢位主理港台關係嘅台灣要員訪港，無聲無息，認真離奇。
我哋打電話問港府有冇官式接待賴幸媛，政制及內地事務局發言人回覆，話特區政府誠意歡迎賴幸媛來港，除咗為佢嘅出入境作出便利安排之外，仲曾經建議安排特區主管涉台事務嘅主要官員會晤，惟台方表示，是次來港純粹為了解台灣在港機構嘅運作情況，行程緊迫，未能與特區官員會面。即係話，原來賴幸媛畀咗個大檸檬特區政府食！
據知賴幸媛此行主要視察中華旅行社業務，無安排與港府或中聯辦官員會面，今日離港。賴幸媛仲話，過去台港官方互動相當冷淡、限制好多，台方覺得，呢方面好多問題要解決咁話。
港府四月初先至大鑼大鼓成立港台經濟文化合作協進會，話要促進港台關係，睇嚟佢哋要加把勁至得囉。