政情：「女神」入校園徐立之暗寸劉遵義
香港大學同中文大學多年嚟鬥大學排名，又曾爭用港鐵「大學站」個名，中大近日鬧出拒絕接收「新民主女神像」風波，港大校長徐立之尋日被問起點睇事件，佢一邊話唔評論其他院校，一邊就話港大好包容，唔會阻止學生任何活動，句句將中大比下去。
港大九七年同樣發生過國殤之柱深夜運送入校園被阻風波，但徐立之當時未執掌港大，所以評論中大風波，特別口響。中大以「政治中立」為由拒收「新民主女神像」，遭學生批評，徐校長尋日就指，大學唔應該有政治立場，但亦應包容異見，又話港大同師生一直緊密溝通，學生任何活動都唔會阻止，但港大地方細，接收「女神像」就唔會嘞，句句同中大喺今次風波嘅做法相映成趣，中大校長劉遵義聽到唔知有乜感覺呢？
徐立之同劉遵義時有不同意見，好似○七年行會成員張炳良選教院校長，劉話非常好，徐則話未有機會見過張炳良，唔知適唔適合，反映兩個校長唔啱嘴形，今次「新民主女神像」風波，徐立之有咁嘅回應，劉遵義應該都唔驚奇。