政情：梁君彥談工資 驚變廿蚊張？
最低工資立法進入最後階段，備受影響嘅飲食業界連番出招，不過，唔知係咪飲食界立法會議員張宇人嘅「時薪廿蚊論」引來各方抨擊，搞到依家個個變成驚弓鳥，幾個行內有名嘅飲食業界代表尋日發表完意見後，都唔願意公開立場。身為主人家嘅經濟動力林健鋒、梁君彥同與會嘉賓李家祥，亦只係話高水平嘅最低工資對行業影響好大，但就唔肯公開表態究竟最低工資水平應該幾多，梁君彥更由心地爆咗一句：「講得太低會好似人哋咁畀人鬧。」
經濟動力尋日個工作坊，邀請咗幾間大型連鎖食肆嘅老闆出席，呻吓最低工資對佢哋嘅影響。某大型連鎖快餐店主席表明，如果最低工資訂喺三十蚊，第一時間唔係諗加價而係諗「精兵制」，五十歲以上首先被裁。另一連鎖麵包餅店經理就話，本來諗住請人做包裝，都話唔請要轉用機器，有薄餅店ＣＥＯ就話連個中央廚房都要北移添。不過，問佢哋點解依家又唔用機器代替人手減低成本，佢哋又話要有企業良心喎，睇嚟最低工資呢單嘢仲有排拗！