回歸十三年，民怨積聚十三年。最近，為了拒絕復建居屋，政府幾個部門連環出招，首先係鬍鬚曾的「九招十二式」，再來市建局的「八辣招」，招式多多，搞到老朽眼花繚亂。當然，最亮麗的要算運輸及房屋局局長鄭汝樺，最近佢如穿花蝴蝶，飛繞大小示範單位，於是老朽可以揸把尺，唔買（係買唔起）都左度度右量量，幾鬼好玩！之不過影相就唔得，話怕老朽攞咗佢啲創意去設計間橋底豪宅喎。
鄭汝樺最近十分頻撲，又訪問新加坡了解當地規管私營房屋的做法，接着又親自撰文，洋洋灑灑浩氣長存的指出：呢個世界邊有半斤八両咁理想，「人人有份工，家家有層樓」，發夢冇咁早！美國都係得把口話去探究火星，家家有層火星屋——仲未係時候！佢苦口婆心、義正詞嚴話畀一眾「無殼蝸牛」知：政府致力為市民安居樂業，有責任令市民「居者有其所」，但「家家有層樓」卻不是現行政策。
鄭汝樺煌煌大論一出，稅務局即飛彈而起扮樓市明燈，預測今年整體稅收會因印花稅收減少而下跌百分之七。鄭局長果然筆落驚風雨，論成泣鬼神，連稅局都未卜先知政府出招狠辣，樓價必降溫，唔建居屋，即使「利益轉移」，時薪廿蚊，只要發揮「飛龍綵帶三色精神」，閣下分分鐘可與張建宗上下層呼應，可與鄭局長做芳鄰。
鄭汝樺局長的鴻文大論改變我一生，老朽當年讀梁啟超一系列「新民說」文章，喚醒我沉睡的靈魂，令我積極人生，做個勇敢中國人；今鄭局長偉論，令我知道要有層樓，只能靠自己！局長燃亮我置業的雄心！