政情：季詩傑轉工由低做起

非也，季詩傑話做大狀上親庭都要朝九晚五，佢想留多啲時間做黨務，搞政治，所以轉做事務律師，所以按規矩要先喺大律師名單中除名。季詩傑轉做事務律師，會加盟大學同學嘅律師樓，不過唔係做合夥人，而係由見習律師做起，至少做五年先夠資歷轉做合夥人喎。

不過，季詩傑一心放棄做大狀竟然受阻，阻佢嘅仲要係佢嘅代表律師。話說高院原定尋日聽取季詩傑除名申請，點知佢個代表律師記錯日子，以為星期六先上庭，所以尋日冇現身，結果申請需要押後處理。季詩傑早前畀前女友斬傷，之後同朋友去飲酒都無端端畀人打一身，依家連申請除名都蝦碌搞唔成，近期運氣認真麻麻。