中環耳目：蔡志明最愛潮州菜風味
潮州人約「家己冷」開餐，離不開食潮菜。潮籍富商玩具大王蔡志明都喜歡潮州風味，每星期例必揀喺家族旗下嘅九龍城廣場佳寧娜潮州菜食晚飯，共享天倫。蔡生同太太口味一致，最愛招牌滷水鵝拼盤。
歎秘製滷水鵝
佳寧娜嘅滷水鵝，每朝由汕頭運來上等獅頭鵝，加上秘製滷水汁滷足一粒鐘製成，鵝肉分外彈牙香濃。滷水鵝拼盤材料豐富，除咗芳香鵝片外，仲有鵝肝、鵝腸、游水墨魚同新鮮五花腩添。
千金蔡加怡就愛食魚，一味冬菜蒸馬友魚啱晒胃口。公子加讚就推介一味煎水瓜烙，呢款菜被喻為「潮州Pizza」，烹調時先將水瓜切片，加入葱花、鮮蝦粒、花生及菜甫粒，加上薯粉煎四、五分鐘就啱啱好，入口香脆肉軟。
九龍城廣場佳寧娜不乏名人捧場，國際巨星周潤發同行政會議成員劉皇發都係常客。
卓妮