中環出更：環保小車唔襯象哥體形
立法會停車場尋日忽然泊多咗架Subaru R2環保小車，當大家估緊邊位議員榮升環保車主時，就見到立法會議員黃定光（象哥）步向小車，原來象哥坐開嘅平治房車入廠維修，所以借咗仔女部小車暫時頂檔。不過，身形大大隻嘅象哥企喺小車前，車同人似乎唔係好協調喎。
買畀仔女代步
Subaru R2小車引擎汽缸容積只有658CC，象哥坦言兩年前購買時都有啲猶豫，對小車馬力信心不大，當時仲質疑話：「咁細部車，夠唔夠力㗎？」車行職員於是畀象哥一家四口親身試車，特登開上斜路測試力水，結果成效令象哥大大改觀，加上車價連稅唔使九萬元，耗油量又低，於是快快扑錘買部畀仔女平時代步。
雖然象哥話R2車仔細細一啲都唔輸蝕，但佢去年跟立法會到珠三角考察時，都彈過當地嘅環保電動車後座座位好細，可能佢覺得R2呢部車闊落啲啦。不過，大車同細車始終有比較，象哥最後補充話，其實佢都係鍾意坐番自己部舊平治房車多啲。
卓妮