今次立法會補選，參與補選奇人甚多，有人倡議攪珠選議員、又有人話特首提名權要與利得稅掛鈎，總之千奇百怪，令市民更覺補選只係鬧劇一場。
不過，選舉氣氛低落同候選人放軟手腳不無關係，選舉事務處尋日向立法會政制事務委員會提交文件指，二十四個候選人中，只有十一人喺郵政署指定寄出選舉郵件截郵日期，即四月三十日前寄出宣傳單張，計埋大專2012五名候選人因為選舉郵件唔合規格被選舉事務處拒絕代寄單張外，仲有八名候選人放棄呢個免費宣傳機會，主動放棄宣傳，令人嘖嘖稱奇。
此外，民間電台過去兩日分別邀請港島區同九龍東候選人出席選舉論壇，公民黨兩名大狀早就話有事做唔會出席，不過原本應承出席嘅港島區大專2012候選人梁永浩亦「甩底」，原因係佢要準備考試喎，最終只有李振雄一人講足全場，而昨日九龍東嘅論壇，亦只有大專2012嘅黎敬輝出席，試問咁又點可能有選舉氣氛呢﹖
順帶一提，港島區嘅候選人仲有戴卓賢、陳淑莊同黃興；九龍東則有梁家傑。