中環出更：雷林靜怡逛JIMMY CHOO無斬獲
九巴新抱雷林靜怡（Jane）生咗三個小朋友後，疊埋心水做媽咪，少咗穿梭Ball場，但少蒲唔代表唔使扮靚，名媛最愛嘅JIMMY CHOO高跟鞋，Jane都好着迷，睇見專門店陳列出春夏季新貨，忍唔住睇完又睇，半小時內二度出入鞋店，可惜都係無收穫。
麥當娜陳慧琳熱捧
一身黑衣型女打扮嘅Jane，早前晏晝獨自出動喺中環置地掃貨，卓妮見佢抽住一袋Prada戰利品，一個箭步趕去JIMMY CHOO「朝聖」。呢個品牌喺名媛界響噹噹，每對鞋閒閒哋賣逾萬銀，但捧場者眾，荷里活巨星麥當娜、歌星陳慧琳都係佢粉絲。
Jane對JIMMY CHOO並唔陌生，一早孭呢個牌子嘅手袋，家中靚鞋更係多不勝數，但靚嘢無人嫌多。Jane呢轉瞄準新高跟鞋出擊，睇到陳列櫃前有一對呢季大熱嘅交叉綁帶鞋，不禁雙眼發光，馬上叫店員攞畀佢試着。可惜試咗十分鐘後都係唔啱，惟有轉戰Fendi睇銀包，但逛足十五分鐘仍然冇收穫。
喺呢個時候，卓妮見Jane心思思掉頭走返入去JIMMY CHOO再次睇鞋，「翻兜」幾對心水鞋款，似乎係想試真啲。Jane愈試愈興奮，喺鏡前左望右望，唔介意喺鞋舖內除埋鞋做「赤腳大仙」，不過試足十五分鐘都係決定唔買，轉身走入LV專門店睇手袋，總之站站名牌，過嘅絕對係闊太生活。