中環出更：田少為乖孫9000萬元買海上行宮
旅遊發展局主席田北俊一向懂得享受生活，衣食住行每一個細節都相當講究，陸上住山頂大屋、開豪華跑車，海上就有勞斯萊斯級豪華遊艇。田少幾乎每星期都會三代同堂遠離煩囂出海玩樂，喺遊艇上留下不少美好回憶。不過，隨着乖孫愈來愈多，遊艇也不敷應用，田少去年初就以「海嘯價」九千萬元，訂製咗一艘007占士邦御用嘅Sunseeker超級遊艇。
田少為推廣長洲大平清醮及搶包山，尋日罕有借出價值三千萬元嘅意大利Riva豪華遊艇，接載傳媒朋友入長洲視察籌備情況，仲落手落腳示範整平安包，卓妮都去咗湊熱鬧。田少艘遊艇取名「Manhattan Express」，「Manhattan」正係佢旗下嘅萬泰集團。田少話，艘遊艇十年前購入，已經係佢第五艘遊艇，船身全長八十呎，船艙內有三間房，一間係佢同太太住，另外兩間分別係囝囝啟文兩公婆、愛女啟安及夫婿嘅私家房。
好多人爭 遲咗交貨
不過，自從田少榮升爺爺兼外公後，多咗三個乖孫，遊艇可用面積即時縮水，三間房要容納一家九口及孫仔玩具實在有啲勉強，所以佢年初趁金融海嘯物價下跌，拍板訂製咗一艘英國品牌Sunseeker Predator 115超級豪華遊艇，遊艇全長一百一十五呎，四十二呎闊，艙內共有五間房，即使再多個孫都住得落。船艙內籠設施及間隔仲可以因應田少嘅喜好而設計，難怪田少形容造艇好似起樓咁複雜，原定今年底就可交貨，但田少上月接獲通知，供應商話要延遲半年才運抵本港，佢估計係經濟復甦較想像中快，多咗人訂貨有關。以佢所知，淨係喺香港就賣咗幾艘。
雖然新遊艇未造好，但田少已計劃喺到手後隨即出售舊遊艇。佢話近年超過一百呎長大型遊艇泊位多咗好多內地人競爭，但遊艇會泊位得幾百個，搵位都幾緊張吓。卓妮以為豪宅畀內地人玩晒啫，原來遊艇都一樣喎！
設備先進 速度見稱
田少訂購Predator 115嗰陣，Sunseeker官方網頁都未見有呢個型號，原來Predator 115型號係新開發產品，僅次於頂級型號Predator 130 ，田少仲係首批買家。Predator 115集先進設計與科技於一身，船艙客廳及飯廳可容納逾十人，而主人套房及客房設備齊全，甚至設有衣帽間，恍如一間海上豪宅。船上備有GPS導航、衞星電視及通訊裝置。由於Predator屬於「Performance」系列，引擎以高效能和速度見稱，最高速度高達三十海里，入長洲半小時就到，絕對係超豪華享受！
卓妮