中環出更：孫太孖好友歎Bonheur法國菜
以教育局局長孫明揚太太鍾小芬為首嘅城中名太慈善組織「心連心」，每個星期三都會齊齊飯局，為咗令各姊妹食得招積又夠出色，佢哋閒時都會四出尋找美食，或者私下同朋友交換美食情報，再返嚟「心連心」推介，價格由幾百蚊一餐到幾千蚊一餐都有。
今次孫太同好姊妹招佩誼（Gloria）幫襯嘅法式餐廳，係下屆國際獅子總會會長譚榮根介紹嘅Bonheur。呢間位於上環文咸東街柏廷坊嘅隱蔽小店，唔訂位唔使旨意有得食。至於有幾好味？就等孫太為大家介紹啦。
孫太同卓妮講，最怕食創意Fusion菜，怕佢唔湯又唔水，所以對傳統菜式最為支持，因為咁，令佢對Bonheur咁有好感。孫太同Gloria當日各自柯打咗午餐，頭盤都係「蜜糖芥末汁醃蘇格蘭三文魚沙律」；主菜方面，孫太揀咗「大蝦紅花意大利飯」，由生米煮成熟飯嘅Risotto，要煮到夠Creamy同夠厚身，已經唔容易，仲要拿捏埋外軟內硬嘅口感就更加困難，難怪孫太對碟粒粒皆辛苦嘅盤中飧相當珍惜。至於Gloria就揀咗「美國蒜蓉汁黑豬柳」做主菜，黑豬柳肉質細滑又夠juicy，鮮甜嘅味道刺激到味蕾識跳舞。
杧果拿破崙俘虜各人
不過，主菜好味都唔好食到咁飽，記得留番啲位畀甜品，事關Bonheur嘅「杧果拿破崙」唔止俘虜咗孫太，仲連立法會議員「肥仔明」李華明都征服埋。香脆嘅酥皮每層都塗上英式忌廉及配上菲律賓新鮮杧果，令人一食難忘。約都冇咁啱，當日喺Bonheur仲撞到全國政協委員蔣麗芸嘅老公梁海明，原來佢都愛上呢款甜品，仲係經朋友介紹首次幫襯；除咗「杧果拿破崙」，主菜羊架一樣令佢食指大動。
不過咪以為好味法國菜一定好貴，Bonheur嘅午餐相當實惠，羊架盛惠148蚊，「大蝦紅花意大利飯」或者「美國蒜蓉汁黑豬柳」只係118蚊就有交易。搞到個個都心思思嘅「杧果拿破崙」同「心太軟」就盛惠48蚊。
卓妮