中環出更：李少光嫁女「遊樂場」宴客
保安局局長李少光去年十月榮升爺爺後，至今唔夠半年仲做埋外父，佢嘅細女李卓穎（Claren）同男友姚舜城（Ken）拉埋天窗，尋日下午二時喺旺角亞皆老街神召會禮拜堂行禮，晚上喺金鐘港麗酒店筵開廿九席，好多政商界名人到場恭賀，尤以政界人士居多。光哥夫婦多咗半邊仔固然開心，但最開心係細女結婚後會搬埋沙田同一屋苑居住，連同大仔霖恩一家，三家人生活樂也融融！
卓妮下午一時到達神召會禮拜堂時，好多賓客已陸續到場，包括政制及內地事務局局長林瑞麟夫婦、前商務及經濟發展局局長馬時亨太太王培琪、黃楚標一家三口、鄉議局主席劉皇發太太吳妹姝、名媛梁王培芳姊妹等。
政界名人紛到賀
晚宴嘅賓客更墟冚，唔少仲係攜眷赴宴，好似運輸及房屋局局長鄭汝樺、消防處長盧振雄夫婦、廉政專員湯顯明、政務司司長三母子等，立法會議員就有林健鋒夫婦、黃宜弘夫婦、方剛夫婦、張宇人夫婦、梁君彥等，黃楚標夫婦、肥亨太太仲係兩場去晒，相當畀面。不過，好多賓客因為光哥做高官，所以避嫌無送賀禮，只係送上誠心祝福！
Claren同Ken相識於澳洲讀書時期，Claren修讀會計，Ken就主修酒店管理，兩人五年前復活節喺悉尼一個遊樂場內經朋友介紹認識，然後拍拖，為咗紀念相識日子，於是揀番喺復活節結婚，而尋晚嘅婚宴會場布置亦以遊樂場作為背景，設有摩天輪、旋轉木馬、七彩氣球等，既浪漫又甜蜜。新郎哥Ken大讚老婆好好，仲話當年幾經艱苦先追到返嚟，所以會好珍惜呢份天賜情緣。
榮升外父同外母嘅光哥夫婦就整日笑到見牙唔見眼，特別係光哥，心情好興奮。問佢滿唔滿意呢個女婿？光哥話：「總之個女滿意，我就滿意喇！」李太就大讚女婿Ken好乖好抵錫，相當滿意，仲話初時想起嫁女都擔心唔捨得，但到今日就好放心交個女畀佢，以後屋企就加多雙筷。不過，講到係咪想抱孫，光哥夫婦就異口同聲話要等啲後生去決定喎。
卓妮