公立醫院事故頻生，醫管局的《風險通報》令人大開眼界。在公立醫院做手術，竟好似去街市買餸咁，買豬肉搭豬骨，買魚腩送魚嘴，買斤菜畀棵葱之類。公立醫院亦好慷慨，做手術當正病人係「人肉儲物櫃」，點都要畀啲嘢你留念。
醫管局○七年十月至○九年九月，共接獲八十四宗醫療事故，其中二十三宗涉及在病人體內遺留儀器或手術用品。其中一單係病人自行扯斷尿喉後，尿喉碎片遺留在體內冇被發現而致膀胱炎，半年後始排出體外；有位孕婦產後陰道出血，醫生用紗布止血，竟然就咁留喺陰道內，一個月後覆診，才知道醫生咁大整蠱；更有初哥醫生失魂到將中央靜脈導管嘅導引線留咗喺病人體內……
總之，閣下去公立醫院做手術，梗有啲嘢回贈畀你，人人有份，永不落空。總之，如果你大便，發現屙咗粒三卡火鑽，你不必驚訝，更毋須詫異，閣下係第一萬個幸運兒，呢個係醫管局醒你嘅大獎。
周一鑊話設立醫療事故通報機制，是希望讓市民了解入院風險（潛台詞是否醫院如屠房？醫生可能是屠夫？），並提醒前線醫護人員小心工作（做手術可以大意嗎？）。如通報及處分機制太苛刻，可能令有關醫護人員不敢上報事故，佢強調「如果係處分，都內部處分，唔會公開譴責員工」。
一鑊，難怪老朽愈睇你愈有佛相，聽君一夕溫柔語，揸手術刀更瀟灑。老朽忽有禪悟：立談數語飄然去，滿徑松花落午風。周施主，人生自古誰無死，留取善心蔭子孫。老朽終於明白中央屠宰遲遲唔拍板嘅原因。